شبابيك الذكرى
احمد صبري
-
في عز الفرح مستنى
آهات بالمر توجعني
ويجي الجرح يدبحني
ومن روحي يضيعني
-
وباستغرب على قلب الحق
باستعجب من بعض الناس
مش بيشوفوا النوع والفرق
إنعدموا عقل وإحساس
رمي تماس من بره الخط
كارت اْحمر لكل شمال
زي ما قالوا زمان بالظبط
إللي بيمشي ورا العيال
-
في عز الضحك تلسعني
دموع بالعين تسرقني
أندم ع اللي راح مني
أحكي لمين ويفهمني
-
كتير بنقع وبنقابل
حكاوي وهم مرسومة
نقول إحنا بنستاهل
وهنتعلم بعد القومة
نقف من تاني ونكمل
أنا وقلبي وقصتنا
ومهما نعاني نتحمل
بيبقى الحزن تالتنا
-
في عز الحلم تصحيني
شبابيك الذكرى ترميني
أسافر أعافر آلاقيني
باحارب دنيا تعاديني
-
ولا باضعف ولا باهرب
ومهما أشوف ما بتهدش
أتعذب ياما وباتغرب
وألم جراح ما تتعدش
واخدها بقوة وبساطة
وأكمل زي قطر يفوت
لا رزق بيجي بوساطة
ولا حد بيهرب م الموت
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.