بحر من الاحساس
احمد صبري
قفلت الباب على روحي
وقولت يا روحي
صارحيني
تعبت بوجعي وجروحي
وكان نفسي
تصالحيني
لحظة خوفي من نفسي
لقيتك واقفة بتنادي
وبتحاربي ظلام ياْسي
ويتلومي علي بعادي
لقيت حضنك بيفتح لي
سكك للدنيا والاحلام
و شفايفك بتسمح لي
اْرسمها علي الايام
فرحت اكيد ومش ناكر
كنت اتمنى الاقيكي
احفظ طبعك واذاكر
همس شفايفك وعينيكي
واقول لك ايه ولا ايه
كتير جوايا متخبي
نصه ممكن بتحسيه
والباقي يخص قلبي
وجع مكتوم وبيصرخ
بحبك مش كلام فاضي
حبك عقد بيتاْرخ
بيلغي كل شيء ماضي
وحلم بيسافر سهران
حيران من بين وبين
يخرج من الوجدان
بدال الصوت صوتين
صوت يطمن عليكي
خايف عليكي عايزك
وصوت بيحس بيكي
ينطق بدال شفايفك
متخافيش الخوف ده ليا
اوعي تبكي مهما اموت
الحنين اللي في عينيا
صوته رافض السكوت
سر حبك على اعلان
نازل على كل اخباري
هاْغنيكي في كل مكان
يا بطلة اجمل اشعاري
وحتى لو هعيش فاهم
اني مجرد انفاس
راكب حلم عايم
في بحر من احساس
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.